ယောဆိုတာ အဲ့သလိုရယ်ပါ ဗျ( ၉ )

တုန်းမောင်း
- - - - - - -
ဗျိုး…
ကျေးရွာအတွင်း
မှီတင်းနေထိုင်ကြကုန်သော
ရွာသူရွာသားအပေါင်းတို့ ခင်ဗျား
မနက်ဖန် နေ့ဆွမ်းတုန်း (မောင်း ) ခေါက်အပြီးတွင်
သူကြီးအိမ်သို့
တအိမ်တယောက် ကြွခဲ့ကြပါဗျို့……………။ ။

ယမန်နေ့က အလုပ်သဘောဖိတ်ကြားချက်အရ Swiss နာရီပြပွဲ တစ်ခုသို့ရောက်ဖြစ်သည်။ကျပ်သုံးသိန်းတန် မှ Us $ ထောင်ဂဏန်းထိ Handmade/ Auto /Quartz နာရီအမျိုးအစားပေါင်းများစွာ ခင်းကျင်းပြသ ထားသည်က လိုချင်တပ်မက်စရာ။
တန်ဖိုးမြင့်နာရီတွေကို ( မဝယ်နိုင်သေးသော်ငြားလည်း) တစ်လုံးချင်းလိုက်ငေးရင်း နာရီမဲ့လည်ပတ်နေသော ကျနော်ငယ်ငယ်က ကျနော့် ယောရွာလေး၏လူနေမှုစနစ်အကြောင်း တွေးမိသည်။
မနက်အရုဏ်တက်လုတွင် ရွာဦးကျောင်းက ဆွမ်းချက် တုန်းမောင်းသံရှည်က ကျေးရွာလေးကို စတင်လှုပ်နိူးလိုက်သည်နှင့် ဆွမ်းချက်ဖို့ပြင်သူကပြင် လုပ်ငန်းခွင်ဝင်ဖို့လှုပ်လှုပ်ရှားရှားနှင့် ရွာလေးစတင် အသက်ဝင်လာတော့သည်။
ယာခင်းအတွင်း အလုပ်လုပ်ကြရင်းဖြင့် နံနက်( ၉ )နာရီခွဲ (၁၀ )နာရီခန့်တွင် နေ့ဆွမ်းပို့ ရန် တုန်းမောင်းရှည်သံကြားသည်နှင့် မနက်လုပ်ငန်းခွင် တကျော့နားကြသည်။
(၁၁)နာရီခန့်မှာတော့ ဆရာတော် ဆွမ်းဘုဉ်းပေးသည့် ကြေးစည်သံ။ ထိုကြေးစည်သံကြားသည်နှင့် ထမင်းပြင်ဆင်စားသောက်ကြသည်။ (အကြောင်းကြီးငယ် မရှိဘဲ ရွာဦးဆရာတော် ဆွမ်းမဘုဉ်းပေးမှီမစားသောက်ကြ။
ဤမျှဘာသာတရားကို တုပ်ကွဦးညွှတ်ကြသည်။
ထို့ပြင် ယောရွာဒေသအများစု သံဃာတော်များမှာ ဆွမ်းခံထွက်ခြင်း မပြုကြရဘဲ ရွာမှ ဆွမ်းဝတ်အလှည့်ကျဖြင့် ကျောင်းသို့ပို့ဆောင်ပြင်ဆင်လှူဒါန်းကြပါသည်။)
နေ့ခင်း (၁၂ )နာရီခွဲခန့်မှာတော့ ပို့ထားသော ဆွမ်းခွက်များ ပြန်လည်သိမ်းဆည်းရန် တုန်းမောင်း အသံတို တီးခတ်ပါသည်။
ထိုအချိန်တွင် ကျွဲနွားများအား စားကျက်သို့လွှတ်ကျောင်းကြသည်။
ညနေ( ၄ )နာရီခန့်မှာ ပန်းကပ်ရန် /သောက်တော်ရေကပ်လှူရန်/ ရွာဦးကျောင်းသို့ ရေပို့လှူရန် တုန်းမောင်းသံရှည် ကြားရပါသည်။
ထိုအခါ ညနေလုပ်ငန်းခွင်သိမ်းကာစားကျက်ထဲ၌လွှတ်ကျောင်း ထားသော ကျွဲနွားများအားချည်တိုင်သို့ မောင်းနှင်သိမ်းသွင်းကြသည်။
ည (၇ )နာရီခန့်မှာတော့ ဘုရားဝတ်တက် အမျှဝေကြေးစည်သံ
ကြားသည်နှင့် အလည်လွန်ကာလသားအချို့မှ အပအားလုံးအိပ်ယာဝင်ကာ ယောရွာလေး၏တနေ့တာလည်ပတ်မှုတိတ်ဆိတ်အေးချမ်းစွာ အဆုံးသတ်တော့သည်။
ရွာလေး၏ တနေ့တာ အချိန်ဇယားက ရွာဦးကျောင်းက တုန်းမောင်း ကြေးစည်သံတို့ သဟဇာတ ကျစွာ။
မှတ်မှတ်ရရ နာရီ ဆိုလို့ တစ်ရွာလုံးပေါင်းပါမှ (၃ )လုံးလား ရှိသည် ထင်သည်။ ရှိသူများကလည်း ပွဲလမ်းသဘင်လေးရှိပါမှတသသ ထုတ်ဝတ်ကြတာမျိုး ဖြစ်သည်မို့ တစုံတရာအချိန်းအချက်လုပ်လျှင်တောင်မှ တုန်းမောင်းသံနှင့် အချိန်းအချက်ပြုတတ်ကြသည်။ (ဥပမာ ။ ။သူကြီးအိမ်ကို ဆွမ်းခွက်သိမ်းတုန်းမောင်းသံကြားလျှင် တစ်အိမ်တစ်ယောက်လာခဲ့ကြပါ လို့ လူစုကြတာမျိုး/
မနက်ဖန် ဟိုဖက်ရွာကို ဆွမ်းပို့တုန်းမောင်းချိန်လောက် သွား
ကြရအောင် ဆိုတာမျိုး တုန်းမောင်းသံဖြင့် အချိန်းအချက်ပြုကြသည်။)
မှတ်မိသေးသည်။ Quartz နာရီတွေ စပေါ်တော့ မြို့ကျောင်း
သွားတက်သည့် တဝမ်းကွဲအမက ဝယ်ပတ်လာသည်ကို လက်တံမပါတဲ့ နာရီ တဲ့ ဆိုကာ အုံးအုံးကျွက်ကျွက် လာကြည့်ကြသည်။လက်တံမပါဘဲနာရီဘယ်လိုကြည့်မလဲ
ဆိုကာ လောင်းကြေးထပ်သူတွေက ရှိသေးသည်။
ခုတော့ ယုတ်စွအဆုံး နွားကျောင်း ထန်းတက်လျှင်ပင် လက်ပါတ်နာရီလေး တဝင်းဝင်းနှင့်။
ကျနော်ကတော့ ရှေးရိုးစွဲဟုဆိုလိုကဆိုစေ ယောချစ်စိတ် အစွန်းရောက် ဟုပြောလိုကပြောကြပါတော့။
မနက်စောစော အိပ်ယာနိူးတိုင်း နရီ စည်းဝါးကျနသောရွာဦးကျောင်းက တုန်းမောင်းသံချိုချိုကို ကြားရလို ကြားရနိူးဖြင့် အမြဲလိုလို နားစွင့်နေမိတတ်မြဲဖြစ်သည်။ ။
Photo၊။ ။ မူရင်းပိုင်ရှင်အား Credit ပါဗျ
ချစ်ခင်စွာဖြင့်
ယောသိင်္ခ